Heb 13 | ATA | STEP | Ioxe, laixe lexe ngingi utotomu ne tangengixa'a ta vivinge noxou Iesu.

a 13:2Tav 18:1‑8, 19:1-3; Rom 12:13

b 13:4Ep 5:5

c 13:5Lap 31:6, 8; Ies 1:5

d 13:6Lex 118:6

e 13:71Ko 4:16

f 13:9Rom 14:17

g 13:11Liv 16:27

h 13:12Ioa 19:17

i 13:13Eva 12:2

j 13:14Eva 11:10, 16, 12:22

k 13:15Lex 50:14, 23

l 13:16Pil 4:18

m 13:171Te 5:12

n 13:18Apo 24:16; 2Ko 1:12

o 13:20Iel 32:40; Ese 37:26; 1Pi 2:25

Hebrews 13

Vaikala sou Peletoto Kaluxusou

1 Ioxe, laixe lexe ngingi utotomu ne tangengixa'a ta vivinge noxou Iesu. 2 ^aMo no mine ta asila me'a no tuala vile ine'e no tualasinge la iengi uvaxai'a mamu nga'avali'a ine'e no tani. Tangengi vulusi mamu, xo no anu 'ilixo ane ne, la ta mitema mose'i mi'oxonu noxi'a ta angelo ia ilavusou uasi. 3 Mo ngaxavutalane'i ane'i ane mixolu no taasou navunavu loxo ngingi kalumo 'a ngongi'a ngexolu ne. Mo ngaxavutalane'i ane'i ane mino'u tu'umaxu loxo ngingi kalumo ngano'u tu'umaxu.

4 ^bXe ngiou no anu taula'i la ngataxanu laixe mo ngasaxila'u taula'ingenge ne laixe. Ia ngailanu 'ilixo masumasua sou vote'i no anu uasi. Xo ngingi ngelavusou lexe Lataua utulusi'a no anu vaikala ane'i ane itaxanu taula'i uasi xe i'oxonu 'ilixo sou vote'i. 5 ^cMo mamu sou masaxa sou lamoli utila no anu maulingenge. Mii ma'ia ngeno'u ne la anu mumomomo ane. Xo Lataua muvikala aloxo 'o, “Eni amomomo sou a'umesinge mo ieli uvaxainge ngaxolu vitanisi uasi.” 6 ^dLa sou nenge ta'oxo pekia'inge no anu vaikala ne aloxo 'o,

“Tila anu ulavusou usu'ulileli,
la sou eni a'ume uasi.
Ta mitema i'oxonu mii ma'ia noxilo?”
7 ^eNgaxavutalane'i ta kisokisou no anu lalotu e miulaxungenge xe mia'aloxu vaikala noxou Lataua tatei mune'e noxinge. Ngaxavutalanu maulixa'a mimuamua'i no anu xe 'ilixo sou mimuxaxu tane'i a loxovaa la ngatovosou ngamulinu. 8 Iesu Kalisito ne muxolu iouvilesisi tatei mo vaimomo 'o xe ili'i mo kaluxu uasi. 9 ^fAloxo ne la sou, ngalomusou potopoto iouvilemo io ngamulinu mo ulapungengi ngalai va'axu mamu. Anu laixe lexe opongengi utulu no anu alauna noxou Latauasi, xo anusi u'oxonu pekia'inge. Ia tangengi utulu no anu lapuloto iouiou sou la'ilali vitanisi uasi. Xo 'ilixo ane loxo ne umomomo sou usu'uline'i ta mitema sou imulinu uasi. 10 Nenge valovalo vile noxinge 'a uxoxolu no tani alelaxu sou lalotu noxou Lataua. Mo ta mitema e ilavusou ixaxai no nano no taasou lalotu noxi'a ta Iutaia ne ilavusou ino'u 'ani no anu uasi. 11 ^gKisi'a ta aili'i utavulenu ta mimii sialuxa'a la uno'u u'unalailixu no anu Kaveutu ane Tavuna Manina sou unixi'u loxo mii sou uxexeenu susu. Ia ta mimii vasime'a ne ixutuxa'a no ale no tanixu pita noxi'a ta Isilaeli tei. 12 ^hMo aloxo Iesu kalumo ne muno'u navunavu no ale no anu aitengaxu vimelusou tuala tila, sou sialuxu unixisi'a ta mitema la ixali malemalenga.

13 ⁱLa sou laixe lexe nenge kalumo talai noxou no ale no anu tanixu pitapita ne, mo sou nenge'a tatavulenu maela ukei. 14 ^jXo no lialia 'o nenge tualasinge tatila vile ulavusou uxoxolu avile uasi. Ia nenge tanenge u'oxoxu tuala tila ane ili'i sou uxali.

15 ^kAloxo ne la sou anu laixe sou nenge ta'itinu Lataua ualasou utotomu no ualasou Iesu, la 'ilixo ne anu uxolu loxo mii nenge ta'oxonu ulai noxou sou u'elaxu sou uxexeenu susu noxinge. Xe tavikala laixe sou ulaa no ananenge la Anu u'osasou. 16 ^lMo nga'oxonu 'ilixo laixe noxi'a ta menexinge mo ngaitixa'a xe ngaiti'a mimii. Tangengi vulusiou 'ilixo ne sou nga'oxonu uasi. Xo 'ilixo ne anu loxo mii nge'oxonu mulai noxou Lataua. 'Ilixo ane ne Anu u'osasou manina.

17 ^mNgaxolu no laaxa'a ta tatilasinge mo ngalomuxa'a xo ane'i ilavusou isu'ulingengi xe isaxila'inge. Xe ili'i la ia'aloxu noxou Lataua no 'a xaixai noxi'a mi'oxonu. No mine ngingi nga'oxonu aloxo ne, la ane'i i'osa sou i'oxonu xaixai noxi'a laixe, ia opone'i tu'umaxu uasi. Ia lexe ngingi ngalosi'a opo tu'umaxu la ane'i imomomo sou isu'ulingengi laixe uasi.

18 ⁿLa sou ngakilakasixe xo nexi temasaxa manina lexe tamulinu 'ili'ilixo lailaixe utotomu, xe nexi telavusou lexe tanexi muxolu malemalenga manina. 19 Eni linga pekia'u noxilo ulai noxinge lexe ngakilakasilo pekia'u mo sou eni apalea ane'e noxinge.

20 ^oTila noxinge Iesu, Anu itema xaviinu sou usaxila'a ta sipsip, mo sialuxu mu'oxo pekia'usou opo vilesisi sou xoluxolu laixe mo kaluxu uasi. Lataua mutulusou no anu soli mo Lataua anu tava'u opo se'isisi. 21 Anu molusi u'oxonu pekia'u 'ili'ilixo lailaixe e muxolu no anu maulingenge umomomo sou ngamulinu masaxa noxou laixe. No anu xaixai noxou Iesu Kalisito la sou u'oxonenge latala ta'oxonu 'ili'ilixo e Anu mumasaxau. Xe ta'itinu ualasou utotomu mo kaluxu uasi. Manina.

22 Ta vivilo noxou Iesu, eni emasaxa lexe ngalomusou vaivaikala peletoto noxilo 'o laixe manina. Xo uoli voloxu e eni ekaukavunu 'o ne veveeni uasi. 23 Mo emasaxa a'alomengi lexe vivinge Timoti 'a milulusou mo mulaa no taasou navunavu. Ia lexe anu une'e uxali noxilo palea, la nexi noxou takei tane'e sou tamaisinge.

24 Ngasovanu aso laixe noxixe ulai noxi'a ta kisokisou no anu lalotu ilo'a ta mitema latala noxou Lataua ukalusi. Mo ta mitema ne Itali e mine'e mixolu 'o, misovanu aso laixe noxi'a mulai noxinge kalumo. 25 Eni akilaka lexe alauna noxou Lataua uxolu noxinge latala ukalusi utotomu.